عرض مشاركة واحدة
قديم 06-09-2015, 07:52 AM   #2
عماد الدين بشير آدم فضل
# مجلس الشورى #
 
الصورة الرمزية عماد الدين بشير آدم فضل
 
تاريخ التسجيل: May 2010
الدولة: الرياض - المملكة العربية السعودية
المشاركات: 1,781
افتراضي

اقتباس:
المشاركة الأصلية كتبت بواسطة عزالدين عبد الله توفيق مشاهدة المشاركة
تم نسج احرفها من وحي عبقر بالجمهورية اليمنية 1996 م
تأليف / عزالدين عبد الله توفيق مبروك
هاجر مساحات الوطن
طاوي الأمل رفقة طريق
للفرحة عشمان كان اضوق
تارك وراي حضناً رفيق
لمة الناس العزاز وسط الفريق
كايس بلاك راحة الزمن
الا بس ياسنجة كان
اوهام شباب في جوف زمن
إلا الزمن كضبلي ظن
كيفنو بعدك كيف يكون
كيفن مجاهلو يتوصفن
شكل الأمان من غير وطن
من غير خريفك وتربتك
أنا ضقت بعدك كم محن
اوصال قليبي أتناثرت
ضاعت هباء و ضاعت سدن
والكون فسيح الدون حدود
أصبح على كتمة وسجن
لجوارحي يفرحن يسعدن
كل الفرح بعدك حرن
سكتت نغيماتو اتلهن
اعشاشو مهجورات فضن
من طير على وتر الصباح
الياما دندن وكم رطن
الهسع قام سافر وراح
بعدت غنيواتو و ناءن
وانا قلبي دونك بس عذاب
أرضاً خراب ما بتنسكن
وخريفا تب ما عاد يعود
زي يوما داك خيرو العطن
شجر القليب يابس وعود
من هجير غربة سنينو الطولن
وانا عقلي بيك اصبح خلاص
تايهات خيوطو بقت تزن
صبحي ومساي وهجعتي
حارمني من راحة البدن
قرب عديل ياسنجة بيك
انا عقلي يشطح بيك يجن
************
لو شفتي كيف بعدك هنا
زولاً وحيد من غير جنى
واحداً فراغ من كم سنة
زولاً غريب تايه براي
عدمان اسم معنى الانا
لافيهو هم بعدك ونى
سكة عذاب مسرح عنى
مرثية من مليون ضنا
من بعدك اصلو دا ما انا
************
يـا سنجه يا شوق الوليد الإنسجـن
ما بين غرامك وغربة طاويها الحزن
غربة ما بتعرف تحن
لو مرة يوم ترحم صباي
ساقتني غصباً عنى عن
ساقتني غصباً عن رضاي
ورمتني في ساحة زمن
خلتني تائه في مداي
مدى الشقا الما بينتهن
فيهو اهاتي وبكاي
ودموعي دم من ذرفن بكن
وخدودي من حرات لهيبن اشتكن
ما سايبى لي الا الوجع
وشوية من اوتار و فن
من نغم حرفي وغناي
بيهن اعزف كم شجن
بيهن هناك ومع الاسى
نيران حروفي أتأججن
************
ياسنجة محروق الحشا
المن دعاشك ما انتشى
و الليه نيلك ما غشى
دروب الغربة ام ناراً تشا
عميان يباري يداقشا
سايب وراو لوحة جمال
راحة خيالو مدشدشا
بالروعة ديما منقشة
دار الحنان الاوحشا
سايب حنينو بلا اختشى
فاكر بدونك دنيا روعة مفرفشة
الا بس جوفوا انحرق
روحو هايمة مشعتفة
ونار فراقك قايدة ديما متشتشا
************
راجي الزمن يا سنجة بس لو بيه يحن
يرجع يعود حضن الوطن
ندمان على هجرك سنين
ندمان على خطوات مشن
اصلو كان
عشقك عنيد
راسماهو روعة على الخدود
النيل بيغزل فيك نشيد
سيرة حروف مزدانة عيد
لوحة جمال دندانا عود
اهداها ليك رب الوجود
تبرق تضوي فرح جديد
فرحاً قديم للزول أنا
لهفة قليب من كم سنة
ارجع أعود فرحان هنا
يعزف المطر الرزاز لحن الغنا
النيل يدندن دندنة
وتصفق أوراق الشجر بهجة وسنا
ونرقص هناك فرحة ما بتعرف عنا
نرقص هناك سنجه وأنا
نضر الله وجهك أيها الشاعر عز الدين توفيق
أرجو ألا تحرمنا من مثل هذا الشعر الجميل من وحي الغربة في اليمن، أعاد الله لليمن السعد سلام شعبه ووحدة أراضيه
عماد الدين بشير آدم فضل غير متواجد حالياً   رد مع اقتباس