العودة   ~ منتديات مدينة سنجة ~ > ®¤*~ˆ° الادب والفنون ®¤*~ˆ° > الشعر والخواطر

إضافة رد
 
أدوات الموضوع انواع عرض الموضوع
قديم 03-13-2016, 11:04 PM   #1
محمد بشاره
:: الامين العام ::
 
تاريخ التسجيل: Feb 2010
المشاركات: 6,493
افتراضي انت سودانى

هل انت سوداني :


اكلت الكسرة باللوبة ؟؟؟
بتعرف تقلب الهوبة ؟؟؟
وعمرك شفتة راكوبة ؟؟
في يوم فلقوك بي طوبة ؟؟
لبستة الجبة مقلوبة ؟؟
حضرت العرضة والنوبة ؟
بتعرف يمة حبوبة ؟
وكت تمرق سعن روبة ؟
...........................................
لعبت شليل .... شليل وين راح ؟
عضم بالليل .... عضم وضاح
جهالة غبش نفتشو صاح
ونلعب يومي ما بنرتاح
....................................
بتعرف تمشي كداري ؟
تسوق العجلة سداري ؟
وتركب في الحمار جاري ؟
تشوت الكورة ضفاري ؟
......................................
هوووووي يا بنية قشي الحوش
ومشطي شعرك المنكوش
وخلي البيت دوام مرشوش
وفرشي في البرندة بروش
.............................................
وكت حماد قعد صنقر
وحلب البقرة واتحكر
وقال للكلبة ابعدي جر
كدي اشرح لي قولة ( عر )
معاها الدوكة والقنقر
وقندول الفريك اخدر
والفرة البتخلع فر
................................
ادليت عقرت خدار
ودحشك فر منك وعااار
وحشيت في الجنينة عدار
وغنيت في الفجر مسدار
............................................
اكيد ما بتعرف الزغرود
ما جربت ضرب السوط
ولا غننلك البنوت
ولا غنمك رعن حنتوت
.......................................
اياديك ناعمة ما خشن
وما جربت موية الشن
وما قفيت غنم طشن
لقيتن في الخدار خشن
......................................
هل شركت لي طيرة
وشركك قام قبض غيره
وكان ديك عمتك خيرة
وترقد صوف وفريرة
..................................
بتحضر مولد المختار
وتسمع للمديح بالطار
والدرويش لف ودار
ونلف برة نحن صغار
.....................................
في يوم قرقرت زمبارة
حضرت الحفلة في الحارة
وباريت ليك طمبارة
سمعت الدنيا دوارة
.......................................
تعرف اللبقة والتربال
شال طوريتو رأس المال
وحزم التكة والسروال
وقال لي ارضه جوكي رجال
...........................................
خروف مضبوح عشان الضيف
وجه مطروح صدوق مازيف
خصالن تتعب الوصيف
وكان واصلت ما حاقيف ..
__________________
اللهم ان اخينا الصادق قدوره فى رحابك واقف ببابك وانت أرحم الراحمين
اللهم اعفو عنه وعافه واجعل الجنة مثواه .. آمييين
محمد بشاره غير متواجد حالياً   رد مع اقتباس
قديم 04-02-2016, 10:35 AM   #2
عماد الدين بشير آدم فضل
# مجلس الشورى #
 
الصورة الرمزية عماد الدين بشير آدم فضل
 
تاريخ التسجيل: May 2010
الدولة: الرياض - المملكة العربية السعودية
المشاركات: 1,808
افتراضي

يا سلام عليك يا ود بشارة
هذه القصيدة تصوير سينمائي جميل لحالتي حينما كنت صبيا وشابا ، القصيدة نقلت نبض الحياة في حياتنا بتصوير بديع قمين بأن يصور فيديو كليب للتعبير عن حياة الريف السوداني.
باك الله فيك أخب الحبيب محمد بشارة
عماد الدين بشير آدم فضل غير متواجد حالياً   رد مع اقتباس
قديم 02-05-2018, 01:16 PM   #3
بشاره على بشاره أحمد
عضو مميز
 
تاريخ التسجيل: Jan 2018
الدولة: مكه
المشاركات: 202
افتراضي

‏ما تدي عواطفك للمابيك
ماتوري مخاوفك لعدويك
شوف الشافك وحب الليك
علي قدر لحافك مد رجليك
بشاره على بشاره أحمد غير متواجد حالياً   رد مع اقتباس
قديم 06-01-2018, 04:40 PM   #4
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

تسلم الغالي ود بشارة
وتحية لكل الحضور
__________________
كمال محمد (قجه) غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة




الساعة الآن 12:10 AM


Powered by vBulletin™ Version 3.8.7
Copyright © 2020 vBulletin Solutions, Inc. All rights reserved. منتديات